ភ្នំពេញ: អង្គការសុខភាពពិភពលោកបានផ្តល់រថយន្តដែលមានបំពាក់ប្រព័ន្ធត្រជាក់ចំនួន ៣ គ្រឿងដល់ប្រទេសកម្ពុជាកាលពីថ្ងៃអង្គារនេះសំរាប់ការដឹកជញ្ជូនវ៉ាក់សាំង។ ក្រៅពីរថយន្តអង្គការសុខភាពពិភពលោក ក៏បានបរិច្ចាគស្រោមដៃអនាម័យ ជែល និងសម្ភារបរិក្ខារវេជ្ជសាស្ដ្រ ដែលមានតម្លៃជាង ៣០ ម៉ឺនដុល្លារ។ រដ្ឋមន្ត្រីក្រសួងសុខាភិបាលលោក ម៉ម ប៊ុនហេងបានធ្វើជាតំណាងទៅទទួលអំណោយដែលបានបរិច្ចាគពីតំណាងអង្គការសុខភាពពិភពលោកប្រចាំកម្ពុជាលោកវេជ្ជបណ្ឌិត លី អាលីឡាន (Dr. Li Ailan)។

រដ្ឋមន្ត្រីក្រសួងសុខាភិបាលបានថ្លែងអំណរគុណដល់អង្គការសុខភាពពិភពលោកប្រចាំនៅកម្ពុជា ទាំងការិយាល័យនៅកម្ពុជា និងការិយាល័យប្រចាំតំបន់ប៉ាស៊ីហ្វិកខាងលិចដែលបានផ្តល់ជំនួយដល់ប្រទេសកម្ពុជាក្នុងការប្រយុទ្ធប្រឆាំងនឹងជំងឺកូវីត-១៩ ។ អង្គការសុខភាពពិភពលោកបានកោតសរសើរចំពោះកិច្ចខិតខំប្រឹងប្រែងរបស់ប្រទេសកម្ពុជាក្នុងការទប់ស្កាត់ការរីករាលដាលនៃជំងឺកូវីត-១៩ ជាពិសេសការចាក់វ៉ាក់សាំងយ៉ាងឆាប់រហ័សនិងការយកចិត្តទុកដាក់ចំពោះអ្នកជំងឺ Covid-19 ។

លោកវេជ្ជបណ្ឌិត លី អាលីឡាន (Dr. Li Ailan) មានប្រសាសន៍ថាអង្គការសុខភាពពិភពលោកនឹងបន្តសហការនិងគាំទ្រវិស័យសុខាភិបាលកម្ពុជា មិនត្រឹមតែប្រយុទ្ធប្រឆាំងនឹងជំងឺកូវីដ -១៩ ប៉ុណ្ណោះទេ។ ទាំងរាជរដ្ឋាភិបាលកម្ពុជានិងអង្គការសុខភាពពិភពលោកបាននិងកំពុងធ្វើការរួមគ្នាក្នុងការអនុវត្តវិធានការនានាដើម្បីការពារការរីករាលដាលនៃជំងឺកូរ៉ូណា។